Hátíðir

Mikjálshátíð, luktarhátíð, þemadagar, jólabasar, aðventugarður, jólaskemmtun, þrettándinn, þorrablót, sólarkaffi, páskaskemmtun og ólympíuleikar

Hlutverk hátíða

Hátíðir skipa stóran sess í lífi skólans og gegna þýðingarmiklu hlutverki í þroska nemenda. Þær endurspegla þá sálarstemmningu sem bærist innra með hverri manneskju í hrynjanda ársins. Sköpuð er ákveðin stemmning í kringum hátíðirnar þar sem áhersla er lögð á samveru og dregnar eru fram myndir sem barnið getur fundið samhljóm með. Þannig geta hátíðirnar haft djúpstæðan tilgang og styrkt tengsl barnsins við eigin veru en jafnframt upplifað sig sem hluta af heildinni.

Hver hátíð á sér aðdraganda, nemendur fyllast eftirvæntingu og tilhlökkun, sem nær sínum hápunkti á sjálfum hátíðisdeginum.

Fyrir utan sjálfar hátíðirnar eru haldnar ýmsar aðrar uppákomur sem einnig hafa það markmið að styrkja félagstengsl skólabarna sín á milli ásamt tengslum skóla og heimilis. Þannig er sköpuð heildræn tilvera fyrir nemendur.

Mikjálsmessa

Dagur heilags Mikjáls erkiengils er þann 29. september ár hvert. Um það leiti er haldin hátíð í Lækjarbotnum sem er hvort tveggja í senn uppskeruhátíð og hátíð heilags Mikjáls. Í sögunni um heilag Mikjál kristallast þær þrengingar og hættur sem verða á vegi okkar í lífinu sem og það hugrekki sem hver og einn þarf til að temja drekann sem á það til að vakna upp, í ytri aðstæðum og innra með okkur.

Drekaleikurinn fer fram í Furudal, undir skugga Drekaskógarins sem er í nágrenni skólans. Leikurinn varir í heila viku og allir nemendu og kennarar taka þátt. Í Drekaleiknum verður til lítið þorp í Drekadal þar sem þorpsbúar sinna ýmsum verkefnum svo sem að baka brauð, elda mat, lita ullarband, tálga og gæta elds og bús.

Í Drekaskógi eru drekarnir ógurlegu og þangað fara hugrakkir riddarar í leit að frægð og frama. En drekarnir verða ekki sigraðir fyrr en drekagullið finnst og þorpsbúum tekst að umkringja þá með söng.

Luktarhátíð

Luktarhátíð er haldin á Marteinsmessu og er tileinkuð heilögum Marteini. Boðskapur hátíðarinnar er gjafmildi. Á þessum árstíma sendir sólin okkur sína síðustu geisla áður en hún hverfur okkur að baki Selfjalls. Nemendur útbúa luktir til að taka á móti geislum sólarinnir, geislum sem umbreytast í innra ljós. Þannig veitum við birtu og yl í tilveru hvers annars með ljóskerum og söng. Bekkirnir gefa hver öðrum smákökur eða annað góðgæti.

Þemadagar

Á þemadögum haustannar eru haldnir handverksdagar þar sem unnir eru ýmsir munir fyrir jólabasarinn. Allir nemendur skólans koma saman og skiptast niður í hópa þvert á árganga. Markmiðið er meðal annars að styrkja félagsleg tengsl á milli aldurshópa. Verkefnin eru fjölbreytt og endurspegla áherslur skólans í efnis- og verkefnavali. Ýmsir fallegir munir verða til á þemadögum og vel er vandað til verka, afrakstur verður seldur á hinum árlega jólabasar Waldorfskólans

Jólabasar

Jólabasarinn er árviss viðburður í nóvember. Hann er í senn fjáröflun og kynning á því starfi sem fram fer í Lækjarbotnum og skemmtilegur vettvangur fyrir börn og fullorðna að mætast við handverksvinnu. Börn, foreldrar, starfsfólk skólans og leikskólans taka sameiginlega þátt í undirbúningi basarsins, í hugmyndavinnu sem og framkvæmd.

Nemendur setja upp brúðuleikhús og barnakaffihús, eldbakaðar pizzur, jurtaapótek, tónlist, töfrar og vandaðir handverksmunir. Við undirbúning og framkvæmd Jólabasarsins er sköpuð skemmtileg stemmning sem börn og fullorðnir taka þátt í og beðið er eftir með mikilli eftirvæntingu.

Jólaskemmtun

Á jólaskemmtun fá foreldrar að upplifa eitt og annað sem nemendur hafa fram að færa af því sem sprottið hefur fram í skólastarfinu á haustönn. Á skemmtuninni eru sýnd leikrit, sungið fyrir foreldra og aðrar listrænar uppákomur.

Þrettándinn

Þegar síðasti jólasveinninn yfirgefur mannabyggðir þá er haldin álfabrenna á skólalóðinni og til að fagna nýju ári er flugeldum skotið á loft.

Þorrablót

Blótað er Þorra í skólanum. Allir bekkir borða saman í salnum og skiptast á að fara með rímur, ljóð eða söngva undir borðhaldi.

Sólakaffi

Þegar daginn tekur að lengja og það sést loks aftur til sólar í Lækjarbotnum, höldum við hátið og fögnum endurkomu sólarinnar. Sólarkaffið er í fyrstu viku í febrúar, þegar fyrstu sólargeislar ársins skína inn í Rauða húsið. Fluttur er hinn sígildi leikþáttur um veðmál sólarinnar og norðanvindsins. Eftir að hafa stigið sólartrommu-dansinn gæðum við okkur á vöfflum og sólarsafa.

Páskaskemmtun

Foreldrum og aðstandendum er boðið á skólaskemmtum fyrir páskafrí. Þar eru nemendur með ýmsar uppákomur sem sprottnar eru úr skólastarfinu á haustönn tengt námsefni vetrarins.

Ólympíuleikar

Ólympíuleikar eru settir upp í anda hinna upphaflegu forn-grísku leika og sameinast allir nemendur skólans sem þátttakendur á sérstökum íþróttadegi, en haldin er vikulöng íþróttahátíð í tengslum við leikana.